Мартăн 17-18-мĕшĕсенче Шупашкарта экскурсипе вĕренỹ туризмне аталантарас енĕпе регионсен хушшинчи "Чĕрĕ уроксем" конференци иртнĕ. Палăртнă мероприяти ĕçне хутшăнма Чăваш Ене Раççейри 18 регионтан представительсем килсе çитнĕ. Сумлă делегатсен йышĕнче - РФ Правительстви çумĕнчи Аналитика центрĕн ертỹçин канашçи Нурали Резванов, РФ Правительстви çумĕнчи ача-пăча туризмне аталантарассипе ĕçлекен Координаци канашĕн членĕсем Александр Осауленко тата Татьяна Козловская. Конференцие хутшăннисем туроператорсемпе вĕренỹ учрежденийĕсем хушшинчи çыхăнăва йĕркелес ыйтăва пăхса тухнă, шалти тата тĕрлĕ çĕре çитсе курмалли туризма аталантарас енĕпе стратегиллĕ çул-йĕре тишкернĕ. Конференци ĕçне Чăваш Ен Пуçлăхĕ Михаил Игнатьев хутшăннă.
"Паян халăх хамăрăн çĕршыврах канма кăмăл тăвать. Пирĕн республикăра вара туризма аталантарса пыма питĕ меллĕ, канма килес текенсемшĕн условисем çителĕклĕ", - тенĕ Михаил Игнатьев. Палăртса хăвармалла, 2013 çултанпа Чăваш Ен туризма аталантарассипе йышăннă федераци программине хутшăнать. Раççей шайĕнче пирĕн регион "Ачасен вĕренỹ туризмĕ" программăна пĕрремĕш кĕрсе юлнă.
Чăваш Енĕн "Чĕрĕ уроксем" программине кĕнĕ объектсем - Чăваш наци музейĕ, Трактор историйĕн, Чăваш тĕррин музейĕсем, Андриян Николаев космонавтăн мемориал комплексĕ, хытă каяшсен полигонĕ - ăсталăх класĕсем ирттернĕ.
Конференци ĕçне пĕтĕмлетсе "Чĕрĕ уроксем" проекта виçĕ регион хушшинче - Чăваш Республикинче, Хакассипе Свердловск облаçĕсенче - аталантарма резолюци йышăннă.
Комментари
Татьяна КОЗЛОВСКАЯ, РФ Правительстви çумĕнчи ача-пăча туризмне аталантарассипе ĕçлекен Координаци канашĕн членĕ:
- "Чĕрĕ уроксем" - экскурсипе вĕренỹ проекчĕ. Эсир пĕлетĕр, нумай регионта вĕренỹ турĕсем пур, анчах та вĕсен эффективлă система çук. Çавăнпа эпир çакăн пек система туса хума, ăна шăпах пилотлă регионсем çинче тĕрĕслесе малашне паха опыта ыттисене пама тĕллев лартатпăр.
Чăваш Республикипе эпир килĕшĕве 2015 çулхи декабрĕн 15-мĕшĕнче алă пусса çирĕплетнĕччĕ. Чăваш Ен ыттисем 1-2 çулта е ытларах вăхăтра тунă çул-йĕре 3 уйăхра пурнăçлама пултарнă. Пĕрлехи тытăмра вĕренỹ тата туроператорсем ĕçлени мана тĕлĕнтерчĕ. Чăваш Республикин Пуçлăхĕ Михаил Игнатьев проекта чи малтанхи тапхăрĕнчех пулăшни те пĕлтерĕшлĕ.
Николай МАКСИМОВ, ачасене хушма пĕлỹ паракан районти центрăн директорĕ:
- Ача-пăча туризмне аталантарас ыйтăва федераци шайĕнче çĕклеме вăхăт тахçанах çитнĕ. Çак тĕлĕшпе Чăваш Ен - ĕçе чи малтан пуçăннă регионсем хушшинче. Пĕр-пĕрин ырă опычĕпе паллашма асăннă форума йĕркелени питĕ пысăк пĕлтерĕшлĕ. "Чĕрĕ уроксем" конференци ĕçне хутшăннă май, республикăри районсен, нумай регион опычĕпе паллашни малашне ача-пăча туризмĕпе çыхăннă çĕнĕ проект хăйĕн çимĕçне парасси пирки пĕртте иккĕленместĕп. Акă, хамăр пата килекен ачасенех тĕслĕх вырăнне илер. Вĕренекенсем тĕрлĕ кружоксенче хăйсен ăсталăхне ỹстереççĕ, тавракурăмне анлăлатаççĕ. Вĕсен пĕлỹ шайне ỹстерме татах та çĕнĕ мелсем хатĕрлемелле. Ятарлă вĕренỹ туризмĕн маршручĕсене ĕçе кĕртни те пысăк витĕм кỹмелле. Ку енĕпе вара пирĕн, каçалсен, ыттисенчен тĕслĕх илмелли пурах. Сăмахран, Улатăр, Етĕрне районĕсем хатĕрленĕ вĕренỹпе туризм маршручĕсем уйрăмах кăмăла кайрĕç.
Источник: "Каçал Ен"