Апрелĕн 12-мĕшĕ Раççейри кашни çыншăн чăннипех паллă кун шутланать. Çак кун, 55 çул каялла, Совет Союзĕн космонавчĕ Ю.А.Гагарин тĕнчере пĕрремĕш хут "Восток" караппа "Байконур" космодромран тĕнче уçлăхне хăпарса Çĕр йĕри-тавра вĕçсе каялла çĕр çине таврăнчĕ. Çав кунтан пуçласа Раççейри кашни ача космоса вĕçес тĕллевпе пурăнма тытăнчĕ.

Комсомольски 2-мĕш вăтам шкулĕнче апрелĕн 1-мĕшĕнчен пуçласа 12-мĕшĕччен Космонавтика кунне халалласа "Тĕнче космонавт куçĕсемпе" ỹкерчĕксен конкурсĕ иртрĕ. Çак интереслĕ конкурса 1-9-мĕш классенче вĕренекенсем тулли кăмăлпа хутшăнчĕç. Ачасен фантазийĕ çав тери анлине кăтартса пачĕ конкурс.

Асăннă конкурспа пĕрлех шкулта "Ачасен туртăмлăхĕн тĕнчи" мастер-класс та иртрĕ. Кунта учительпе пĕрле вĕренекенсем самолетсен моделĕсене ăсталама хутшăнчĕç. Уйрăмах 5-мĕш классем пысăк хастарлăх кăтартрĕç. Конкурса пĕтĕмлетсен 6-мĕш классенче вĕренекенсем Анастасия Чипчигинăпа Юлия Артюшкина - пĕрремĕш, Диана Антоновăпа Даниил Галкин - иккĕмĕш, Нармин Джаббаровăпа Аделина Николаева виççĕмĕш вырăнсене йышăнни палăрчĕ. Марина Кошева, Евгений Кокорев, Евгений Шишкин, Анастасия Авдеева, Виктор Владимиров конкурсăн ятарлă сертификачĕсене çĕнсе илчĕç.

Ф.В.ГАВРИЛОВ. 

Источник: "Каçал Ен"